Արխիվ | "Միջոցառում" կատեգորիա
Միջոցառում նվիրված Էդուարդ Բոյաջյանի 95 ամյակին
Հեղինակ` Abraham Balabanyan | Կատեգորիաներ` Միջոցառում, Մուսալեռցիներ | October 22nd, 2010
Հոկտեմբերի 22-ին Էդուարդ Բոյաջյանի անվան թիվ 121 դպրոցի բակը մարդաշատ էր: Այդ օրը նշվեց անվանի արևմտահայ, բանաստեղծ Էդուարդ Բոյաջյանի 95 ամյակը: Բանաստեղծի անունը կրող դպրոցը` հանձինս դպրոցի տնօրինության ու սաների, մեծ ոգևորությամբ էր նախապատրաստվել այդ օրվան: Միջոցառման սկիզբն ազդարարեցին դպրոցի տաղանդաշատ երեխաներն իրենց բեմադրած հայկական պարով, որին հետևեց դպրոցի տնօրենի խոսքը:
Հուզմունքը անթաքույց էր ոչ միայն դպրոցականների և ներկաների, այլ նաև` մուսալեռցիների մոտ, չէ որ հիշատակվում և փառավորվում էր իրենց նախնիներից սերված մեկը, ով իր գրչով լույս էր սփռել հայ պատմության մութ էջերին:
Միջոցառման բացմանը հաջորդեց դպրոցում Էդուարդ Բոյաջյանին պատկանող մի փոքրիկ անկյան` թանգարանի բացումը: Ու թեև թանգարանն այնքան էլ մեծ չէր, սակայն բավարար էր համալիր կերպով հասկանալու, թե ով է եղել արևմտահայ գրող Էդուարդ Բոյաջյանը: Հատկապես տպավորիչ էր դպրոցի միջանցքում երեխաների կողմից բեմադրված հայկական գյուղական անկյունը` իր հացթուխով, խմոր շաղող կնոջով և խաղող ճզմող պարմանուհիով:
Թանգարանի բացմանը հաջորդեց երգն ու արտասանությունը: Երեխաներն իրենց հիանալի ասմունքով ներկաներին մի պահ տեղափոխեցին բանաստեղծի ապրած ժամանակաշրջանը, իսկ հայրենասիրական երգերով մեծապես ոգեշնչեցին և շատերի սրտում արթնացրին թերևս վաղուց արդեն նիրհած սերն առ հայրենիք:
Միջոցառմանը ներկա էին «Մուսալեռ» հայրենակցական միության հիմնադիրներից Ղազարյան Մովսեսը, երիտասարդական թևի վարչության անդամներ Ղազարյան Սոսին ու Շարբաթյան Արամը և խորհրդական Գաբրիել Փանոսյանը:
Արշավ դեպի Ամբերդ: Ընդհանուր ժողով Բյուրականում
Հեղինակ` Abraham Balabanyan | Կատեգորիաներ` Արշավ, Ժողով, Միջոցառում, Մուսալեռցիներ, Վարչություն | October 10th, 2010
Հոկտեմբերի 10-ի վաղ առավոտյան «Մուսալեռ» հայրենակցական միության երիտասարդական թևի մոտ 50 անդամներ մեծ ավտոբուսով ուղևորվեցին դեպի Ամբերդ: Երիտասարդները շրջեցին Ամբերդի պարիսպների ներսում, եկեղեցում միասին երգեին «Հայր Մեր»-ը:
Կեսօրին ավտոբուսը Ամբերդից ճանապարհ ընկավ դեպի Բյուրական` Հովսեփ Սեֆերյանի առանձնատուն: Մեծ սեղանի շուրջ սկսվեց ընդհանուր ժողովը, որը արտահերթ էր: Այն վարեց երիտասարդական թևի ատենապետ Աբրահամ Բալաբանյանը: Ժողովի ընթացքում քննարկվեցին շատ հարցեր կապված վարչության աշխատանքների և երիտասարդական թևի մյուս անդամների գործունեության հետ: Ձևափոխվեց վարչության կազմը. փակ քվեարկությամբ նախկին վարչության երկու անդամների փոխարեն ընտրվեցին նոր չորս վարչականներ: Այժմ վաչությունը կազմված է 9 անդամներից` Բալաբանյան Աբրահամ, Կրրկյան Վահե, Շաննակյան Հասմիկ, Ղազարյան Սոսի, Համբարձումյան Արսեն, նոր անդամներ` Շարբաթյան Արամ, Ղազարյան Վարդուհի, Գասամանյան Ծաղիկ, Մարտիրյան Վիկտորյա:
Ժողովից հետո «Մուսալեռ» հայրենակցական միության երիտասարդական թևի 10 անդմաներ, ովքեր այս տարի ստացել էին ավարտական վկայական, որպես խրախուսանք վարչության կողմից ստացան անվանական բաժակ-հուշանվերներ:
Ճաշկերույթից և ջերմ ու մտերմիկ զրույցից հետո երիտասարդ մուսալեռցիները վերադարձան Երևան:
Դեպի Ամբերդ և Բյուրական
Հեղինակ` Abraham Balabanyan | Կատեգորիաներ` Արշավ, Ժողով, Հայտարարություն, Միջոցառում, Վարչություն | October 4th, 2010
Հոկտեմբերի 10-ին, կիրակի առավոտյան ժամը 8.00-ին մեծ ավտոբուսով տեղի կունենա արշավ դեպի Ամբերդ և Բյուրական: Առաջին կանգառը կլինի Ամբերդում, որտեղից ավտոբուսը կուղևորվի դեպի Բյուրական` Հովսեփ Սեֆերյանի առանձնատուն: Այնտեղ կլինի արտահերթ կարճատև ընդհանուր ժողով` կլինեն վարչական կազմի փոփոխություններ, կքննարկվեն որոշ հարցեր: Ժողովից հետո տեղի կունենա ճաշկերույթ և երգ ու պար:
Երեկոյան ժամը 18.00-ին ավտոբուսը ետ կվերադառնա Երևան` Հ. Թումանյանի տուն-թանգարան, որտեղ կազմակերպվելու է բարբառների մրցույթ: Մուսա լեռան բարբառը կներկայացնի «Մուսալեռ» հայրենակցական միության երիտասարդական թևի խորհրդական Գաբրիել Փանոսյանը, ում իրենց ներկայությամբ կաջակցեն մուսալեռցի երիտասարդները:
Միջոցառման ավարտից հետո ցանկացողները կարող են մասնակցել Էրեբունի-Երևանի տարեդարձին նվիրված մեծ տոնին:
Ցանկալի է «Մուսալեռ» հայրենակցական միության երիտասարդական թևի բոլոր անդամների ներկայությունը:
Մանրամասների համար խնդրում ենք կապ պահպանել:
Մուսա Լեռան հերոսամարտի 95-ամյակին նվիրված տոնախմբություն
Հեղինակ` Abraham Balabanyan | Կատեգորիաներ` 95-ամյակ, Միջոցառում, Մուսալեռ գյուղ, Մուսալեռցիներ, Տոնակատարություն | September 19th, 2010
95 տարի է անցել Մուսալեռան հաղթական հերոսամարտից: Մեծ շուքով ու խանդավառությամբ այս մեծ հաղթանակը արդեն նշվել է Այնջարում, Մուսալեռում, ԱՄՆ-ի, Կանադայի, Ավստրալիայի և Եվրոպայի շատ քաղաքներում: Հերոսամարտի 95-ամյակին նվիրված հնգօրյա միջոցառումներից հետո տոնախմբությունը սկսվեց նաև Հայաստանում:
Դեռ շաբաթ երեկոյան արդեն մարդկանց մեծ բազմություն էր հավաքվել Մուսալեռան հուշարձանի շուրջ: Մինչ հարիսատանը 95 կաթսաներում եփվում էր հարիսան, խարույկի շուրջ չէին լռում Մուսալեռան թմբուկն ու զուռնան, մինչև ուշ գիշեր պար էին բռնել մուսալեռցիները և ուղղակի հուշարձան այցելուները:
Շատերը վրաններում ուրախությունը շարունակեցին մինչ առավոտ:
Կիրակի առավոտյան ժամը 9-ին Մուսալեռան հուշարձանի մոտ տեղի ունեցավ Սուրբ Պատարագ և հոգեհանգստի արարողություն: Ժամը 11-ին սկսվեց տոնակատարության պաշտոնական մասը: Մուսալեռան հուշարձանից 95 ամյակին նվիրված տոնախմբության հանդիսավոր բացումը կատարեց «Մուսալեռ» հայրենակցական միության երիտասարդական թևի ատենապետ Աբրահամ Բալաբանյանը: Այնուհետև ելույթ ունեցան «Մուսալեռ» հայրենակցական միության նախագահ Պերճ Ղազարյանը, ՀՀ սփյուռքի նախարար Հրանուշ Հակոբյանը, Վագֆից ժամանած Պրն. Հերգելյանը և այլ պաշտոնական անձիք:
Այս ողջ ընթացքում հարիսատանը «Մուսալեռ» հայրենակցական միության երիտասարդական թևի անդամները տուփերի մեջ էին բաշխում արդեն պատրաստ հարիսան, իսկ հուշարձանի դիմաց հնչում էին Մուսալեռան երգերը, պարային համարներ էին կատարում տարբեր խմբեր` ելույթ ունեցան «Կարին» և «Վերադարձ» ազգագրական պարային համույթները:
Պաշտոնական մասի ավարտից հետո ներկաները թմբուկների ուղեկցությամբ այցելեցին հարիսատուն, որտեղ հանդիսավոր կերպով Սրբազանը օրհնեց հարիսան, որից հետո մատաղը բաժանվեց ժողովրդին:
Լուսանկարների ցուցահանդես: Ֆիլմի դիտում
Հեղինակ` Abraham Balabanyan | Կատեգորիաներ` 95-ամյակ, «Մուսա Լեռան 40 Օրը», Այնջար, Թերթեր, Միջոցառում, Մուսալեռ, Մուսալեռցիներ, Նարեկացի, Ցուցահանդես | September 16th, 2010
Սեպտեմբերի 16-ին «Նարեկացի» արվեստի միությունում Մուսալեռան հերոսամարտի 95-ամյակի առթիվ տեղի ունեցավ լուսանկարների ցուցահանդեսի բացում` «Մուսա լեռան և Այնջարի հին ու նոր լուսանկարներ» խորագրով: Ներկայացված էին շուրջ 150 լուսանկարներ` 1915-2010թթ. բոլոր ժամանակաշրջաններով: Լուսանկարներում պատկերված են 1915թ. Ֆրանսիական նավերով մուսալեռցիների փրկությունը, ֆրանսիական վեց նավերը, 1915-1919թթ. Պորտ Սաիդի վրանաքաղաքից տեսարաններ, 1919-1939թթ. Մուսա լեռան և նրա վեց գյուղերի դրվագներ, 1939թ. Պասիթը և արտագաղթը, 1939-2010թթ. Այնջարը և ներկայիս Մուսա լեռը:
Լուսանկարների մեծ մասը` բացառությամբ Մուսա լեռան և Այնջարի այսօրվա լուսանկարների, բերված են Այնջարից, որտեղ նույնպես կայացել էր նմանատիպ ցուցահանդես: Լուսանկարների հեղինակներն են մուսալեռագետ Վահրամ Շեմեսյանը և Լևոն Թաշչյանը:
Ձեռնարկին ներկա էին «Մուսալեռ» հայրենակցական միության վարչությունը, երիտասարդական թևի անդամները, Վագֆից ժամանած մուսալեռցիներ և այլոք:
Միջոցառման բացումը կատարեց «Մուսալեռ» հայրենակցական միության երիտասարդական թևի ատենապետ Աբրահամ Բալաբանյանը: Իր խոսքում նա ներկայացրեց ցուցահանդեսը և շնորհակալություն հայտնեց Այնջարի «Կարմիր լեռ» կոմիտեությանը, Վահրամ Շեմեսյանին, Լևոն Թաշչյանին, Գաբրիել Փանոսյանին և «Նարեկացի» արվեստի միությանը ցուցահանդեսի կայացման համար, ինչպես նաև պատմեց դեպի Մուսա լեռ կատարված ուխտագնացության մասին:
Ապա խոսեց «Մուսալեռ» հայրենակցական միության նախագահ Պերճ Ղազարյանը: Նա ներկայացրեց Ստամբուլի «Մուսալեռ» հայրենակցական միությունը և խոսքը փոխանցեց Հակոբ Հերգելյանին: Վագֆցիների անունից նա ողջույնի խոսք ասաց ներկաներին, որից հետո բոլորը ունկնդրեցին Այնջար-70 երգը` էկրանին տեսնելով Այնջարի լուսանկարներ` հիմնադրումից 70 տարի անց: Երգը ուղեկցվեց պարով:
Տեսանյութի ավարտից հետո ներկաները մեծ հետաքրքրությամբ դիտեցին ցուցադրված լուսանկարները:
Օրվա վերջում ցուցադրվեց «Մուսա լեռան 40 օրը» ֆիմը հայերեն թարգմանությամբ` նկարահանված Ֆրանց Վերֆելի համանուն վեպի հիման վրա:
Ձեռնարկի հեղինակը «Մուսալեռ» հայրենակցական միության երիտասարդական թևն էր:
Ցուցահանդեսը կշարունակվի մինչև տոնակատարությունների ավարտը` սեպտեմբերի 19:
Օրվա միջոցառման մասին գրել են PANORAMA.AM, A1PLUS.AM, ARMENPRESS.AM, ASBAREZ.COM, NAREGATSI.ORG վեբ-կայքերը:
-
"Միջոցառում" կատեգորիայի արխիվներ
Հանգանակություն
Մեր խումբը ֆեյսբուքում
ՎԵՐՋԻՆ ՆԿԱՐՆԵՐԸ
The Weather
Մուսա Լեռ20/05/2012, 05:48
Intermittent clouds16°C