Արխիվ | "Սբ. Սարգիս" կատեգորիա

Փետրվարի 19-ին, Սբ Սարգսի տոնին, մեծ խանադավռությամբ նշվեց «Մուսալեռ» հայրենակցական միության երիտասարդական թևի 2-րդ տարեդարձը: Ներկա էին երիտասարդական թևի 40 անդամներ:
Երիտասարդները միմյանց մաղթեցին 3-րդ տարդարձը նշել նաև նոր անդամներով, իսկ այս մեկ տարվա ընթացքում իրականացնել նորանոր ծրագրեր և նոր ուժով շարունակել բռնած ուղին:
Միջոցառման ողջ ընթացքում տիրում էր տոնական և ջերմ տրամադրություն: Օրվա վերջում, տոնական տորթի հանդիսավոր կերպով բերվելուց հետո, բոլոր մուսալեռցիները շրջան կազմեցին ու պարեցին Մուսա լեռան ավանդական «Դաբկե» պարը:

բոլոր նկարները…

Հունվարի 31-ին <<Մուսալեռ>> ռեստորանային համալիրում տեղի ունեցավ մեծ միջոցառում: <<Մուսալեռ>> հայրենակցական միության երիտասարդական թևում կրկնակի տոն էր` նշվում էր առաջին տարեդարձը և Սբ. Սարգսի տոնը: Միջոցառմանը ներկա էին 60-ից ավել երիտասարդ մուսալեռցիներ և վարչության կողմից հրավիրվածներ: Որոշ երիտասարդներ առաջին անգամ էին եկել: Նրանք բոլորն էլ լրացրին դիմումնագրերը ու համալրեցին երիտասարդական թևի շարքերը:

Միջոցառման բացման խոսքն ասաց վարչության անդամ Հովհաննես Բալաբանյանը: Նա շնորհավորեց երիտասարդական թևի առաջին տարեդարձը: Ապա խոսեց Գաբրիել Փանոսյանը` ողջունելով և ուրախ ժամանց մաղթելով ներկաներին:

Երեկոյան բոլորը ճաշակեցին մուսալեռցիների կողմից պատրաստված համեղ թխվածքները և հոբելյանական տորթը, որը հանդիսավոր կերպով կտրեցին վարչության անդամները: Ապա բոլորը միասին երգեցին երիտասարդական թևի հիմնը դարձած <<Մուսալեռցի>> երգը:

Գաբրիել Փանոսյանը շնորհավորեց բոլորի տոնը ու հետաքրքիր դրվագներ պատմեց` կապված երիտասարդական թևի ստեղծման ու երիտասարդների հետ: Նա շնորհակալություն հայտնեց բոլոր բարեգործներին, որոնք միշտ երիտասարդների կողքին են, ինչպես նաև Աբրահամ Բալաբանյանին և Կարեն Բդոյանին` վեբ-կայքը ստեղծելու համար:

Ապա խոսեց Հովսեփ Սեֆերյանը` շնորհավորելով ու նորանոր հաջողություններ մաղթելով երիտասարդ մուսալեռցիներին:

Օրվա վերջում տեղի ունեցավ վիճակահանություն, որի արդյունքում 10 հաջողակներ ստացան տարբեր նվերներ:

Ողջ միջոցառման ընթացքում չդադարեցին երգն ու պարը: Ամբողջ երեկո նվագեց Մուսալեռան թմբուկը` ապահովելով բոլորի բարձր տրամադրությունը:

Շնորհակալություն ենք հայտնում Սերոբ և Մադլեն Տեր-Պողոսյաններին` երիտասարդական թևին 50000 դրամով հովանավորելու և Հովսեփ Սեֆերյանին` 10000 դրամով հովանավորելու համար: Ինչպես նաև <<Մուսալեռ>> ռեստորանային համալիրին` երիտասարդ մուսալեռցիներին աջակցելու ու ջերմ ընդունելու համար:

բոլոր նկարները…

<<Շողակաթ>> հեռուստաընկերության և <<Մուսալեռ>> հայրենակցական միության երիտասարդական թևի համատեղ ջանքերով Մուսալեռ գյուղում պատրաստվեց հեռուստատեսային հաղորդում` կապված Սբ. Սարգսի տոնի հետ: Տեսանյութում պատկերված են ավագ և երիտասարդ սերնդի մուսալեռցիների մասնակցությամբ Սբ. Սարգսի տոնին վերաբերող Մուսալեռան ավանդական ուտեստների պատրաստումը, տարեցների պատմությունները, ինչպես նաև Մուսալեռան երգն ու երաժշտությունը: Նկարահանումները կատարվեցին Թոսունյանների տանը:

Հաղորդումը կհեռարձակվի <<Շողակաթ>> հեռուստաընկերության եթերում Սբ Սարգսի տոնին` հունվարի 30-ին, շաբաթ օրը, առավոտյան ժամը 9.00-ին:

Շնորհակալություն Թոսունյանների ընտանիքին և <<Շողակաթ>> հեռուստաընկերությանը:

բոլոր նկարները…

Հայաստանում Մուսա լեռան երիտասարդական միության առաջին հավաքը տեղի ունեցավ 07.02.2009թ., ժամը 17-00-ին` Նարեկացի արվեստի միությունում (ՆԱՄ): Հավաքին ներկա էին 45 երիտասարդներ:

Մուսա լեռան բարբառով հնչեց ողջույնի խոսքը Գաբրիել Փանոսյանի կողմից, այնուհետև Գաբրիել Փանոսյանը ընթերցեց կանոնադրությունը: Բարի գալուստի խոսքից հետո հավաքված երիտասարդներից յուրաքանչյուրը ինքն իրեն ներկայացրեց` ասելով թե Մուսա լեռան որ գյուղից և որ գերդաստանից է:

Հավաքի համար Նարեկացի կենտրոնը սիրահոժար կերպով տրամադրվել էր Մուսա լեռան երիտասարդական միությանը, որի համար Գաբրիել Փանոսյանը իր շնորհակալական խոսքը հայտնեց Թովմաս Այնթաբյանին:

Ապա հրավիրեց Նարեկ Հարությունյանին, որն իր խոսքը ուղղեց ներկաներին: Դրանից հետո Թովմաս Այնթաբյանը հայտնեց, որ շատ ուրախ է, որ ՆԱՄ-ում առաջին անգամ հնչեց Մուսա լեռան բարբառը:

Մուսալեռ Հայրենակցական Միության կողմից խոսք առավ վարչության անդամներից Վարդգեսը, որը ողջունեց երիտասարդական միության ստեղծումը, բայց նշեց, որ երիտասարդական միության ստեղծումով հետագայում պառակտումներ չլինեն միության մեջ: Նշեց նաև, որ Վագ‎‎‎‎‎‎‎‎‎ըֆ գյուղը միակն է, որը մնացել է քրիստոնեական և ունի իր եկեղեցին:

Ողջույնի խոսքը հասավ Հայրենակցական Միության նախագահին` Պերճ Ղազարյանին, որը շատ էր ուրախացել, որ այդքան մուսալեռցի երիտասարդներ էր տեսել: Նշեց, որ 60-ական թթ-ից գործում է Հայրենակցական միությունը, նշեց հիմնադիրների անունները և ներկաներին բաժանեց Մուսա լեռի գրքույկները:

Այնուտետև Սոնյա Թաշյանը խոսեց Սուրբ Սարգսի տոնի մասին, ասեց, որ Մուսա լեռում ունենք Սուրբ Սարգսի սրբավայրը: Նշեց Սուրբ Սարգսի քումբայի պատրաստման եղանակը:

Գևորգ Հաճյանը ներկայացավ իր երգով: Ներկաների մեջ էր նաև Բրազիլիայի հյուպատոս Հովսեփ Սեֆիլյանը, որն իր քաջալերական խոսքը հնչեցրեց ներկաներին, որը սակայն ծագումով մուսալեռցի չի:

Խոսք առավ նաև Հայր Թորգոմ Տոնիկյանը, որը պատմեց իր` Մուսա լեռան այցելության հուշերից:

Ներկա 7 կամավորականներից կազմվեց վարչության անդամներ.

1. Շաննակյան Հասմիկ

2. Ղազարյան Սոսի

3. Չախչախյան Տաթևիկ

4. Դերմիշյան Հովհաննես

5. Հայրապետյան Նարինե

6. Աշկարյան Լուսինե

7. Մանուկյան Անի

Այնուհետև Եսայի Չախչախյանը ողջունեց երիտասարդական միության ստեղծումը:

Գևորգ Չաքմանյանը, որ Տարոն Երգչախմբի ղեկավարն է և Մուսալեռցի փեսա, հանդես եկավ իր երգով:

Սոսի Ղազարյանի կողմից ներկաներին բաժանվեց սուրբ Սարգսի տոնին նվիրված փոքրիկ գրքույկներ:

Այնուհետև բոլոր հավաքվածները միասին սկսեցին երգել <<Հալա-հալա նինոյե>> երգը:

Հայր Հովակիմ Մանուկյանը օրհնեց սեղանը, ապա ներկաները հյուրասիրվեցին ավանդական սուրբ Սարգսի քումբայով, Մուսա լեռան պանիր հացով և կաթնի քաղքայով:

Փակման խոսքը հնչեցրեց Հայր Հովակիմ Մանուկյանը` նշանաբան ունենալով <<Հաջորդ անգամ Մուսա լեռում>>:

Այնուհետև բաժանվեց դիմումագրեր` միությանը անդամագրվելու համար :

Մասնավոր շնորհակալություն հայտնվեց այդ օրվա հյուրասիրություն պատրաստողներին:

բոլոր նկարները…