Օգոստոսի 13-ին, կեսգիշերին Այնջարից սկսվեց ուխտագնացություն դեպի Մուսա լեռան պատմական վեց գյուղեր և Քեսապ: Բարեմաղթանքներ և օրհնություն ստանալուց հետո շուրջ 150 մուսալեռցիներ երեք մեծ ավտոբուսներով ճանապարհ ընկան:

Կտրել անցնելով Սիրիայի ողջ տարածքը` 15 ժամվա երկար ու հոգնեցուցիչ ճանապահից հետո ուխտավորները հասան Մուսա լեռ` Քեբուսյեի ծովեզերք, որտեղ ճաշեցին ու հանգստացան մուսալեռցու պատկանող հյուրանոցում:

Նույն օրը երեկոյան ուխտավորներն այցելեցին Վագֆ գյուղ, Թուրքիայի միակ հայկական գյուղը, որտեղ մինչ այսօր ապրում են մուսալեռցիներ: Գյուղում ճաշակեցին Վագֆցիների պատրաստած համեղ ուտեստները և մինչև ուշ գիշեր զվարճացան Մուսալեռան թմբուկի ու զուռնայի երաժշտության ներքո:

Հաջորդ օրը առավոտյան սկսվեց շրջագայությունը Մուսալեռան պատմական գյուղերով: Առաջին գյուղը Խդրբեկն էր, որի սառնորակ ջուրը խմելուց հետո, պատմական սոսիի դիմաց բոլորը շրջան կազմեցին և պարեցին ավանդական “տապկե” պարը: Հենց այս սոսիի դիմաց էլ առաջին անգամ երգվեց «Այնջար-70» երգը: Ուխտավորները, սոսիի դիմաց խմբակային լուսանկարից հետո, սկսեցին շրջել գյուղով:

Խդրբեկից բոլորը ուղևորվեցին դեպի Յողնուլուխ գյուղ: Գյուղով շրջելուց հետո մուսալեռցիները հավաքվեցին Առաքելական կիսաքանդ եկեղեցում, որը այժմ վերածվել է մզկիթի: Տեր Հայրը, որ կնքվել էր այդ եկեղեցում, հուզիչ պատմություններ պատմեց, ապա միասին երգեցին “Հայր Մեր”-ը:

Հաջորդ գյուղը Հաջի-Հաբաբլին էր: Ամբողջ գյուղը շրջելուց հետո ուխտավորները շարժվեցին Բիթիաս, որը ամենից մոտն է գտնվում Մուսա լեռանը:

Մուսալեռցիները վայելեցին Բիթիասի անմահական աղբյուրի ջուրը, շրջեցին գյուղով, տեսան մզկիթի վերածված Ավետերանական եկեղեցին, բակում գտնվող պատմական սոսին, ապա այցելեին դեռևս կանգուն Առաքելական եկեղեցի: Այս եկեղեցին կիսակառույց է, գմբեթը բացակայում էր: Եկեղեցում միասին երգեցին “Տեր Ողորմյա”-ն:

Վերջում մուսալեռցիները գնացին տեսնելու Բիթիասի հայտնի կամուրջը, ապա լվացվեցին գետում:

Բիթիաս գյուղից ուխտը շարունակվեց դեպի Քեբուսյե: Քեբուսյեում ուխտավորները շրջեցին գյուղի փողոցներով և բարձրացան Սբ. Սարգսի աստիճաններով դեպի բարձր ժայռը, որտեղ աղոթեցին:

Այս շրջագայության ընթացքում շատերը գտան իրենց պապենական տները, շատերն էլ` ոչ, քանդված էին: Ամեն գյուղ մտնելուց առաջ խոսվում էր այդ գյուղի պատմության և մարդկանց մասին: Ողջ ուղևորությունը անցավ հուզիչ մթնոլորտում:

Վերջին գյուղը Վագֆն էր, որտեղ արդեն հավաքվել էին բազում մուսալեռցիներ, հնչում էր թմբուկի ձայնը, և կաթսաներում եփվում էր հարիսան: Վագֆում ելույթ ունեցան և գյուղին նվիրատվություններ կատարեցին շատ մուսալեռցիներ: Մինչև ուշ գիշեր տևած երգ ու պարից հետո, ուխտավորները վերադարձան ծովեզերք, հյուրանոցներ:

Հաջորդ օրը առավոտյան Վագֆի եկեղեցում բոլորը ներկա գտնվեցին պատարագին, հարիսայի օրհնությանը, ճաշակեցին մատաղը` համեղ հարիսան և հրաժեշտ տվեցին Մուսա լեռին: Ավտոբուսները ուղևորվեցին դեպի Քեսապ, Սիրիա: Քեսապում մուսալեռցիները իջևանեցին ազգությամբ հայի պատկանող հյուրանոցում, մինչ ուշ երեկո մասնակցեցին խնջույքին և զվարճացան: Կեսգիշերին ոմանք այցելեցին հարիսայատուն, որտեղ արդեն եփվում էր հարիսան, իսկ մեծ սոսիի դիմաց նվագում էր թմբուկը, և պար էին բռնել քեսապցիները: Հաջորդ առավոտյան ուխտավորները մասնակցեցին Քեսապի եկեղեցում պատարագին, ճաշակեցին հարիսան:

Ուխտագնացությունն այսքանով ավարտվեց: Կեսօրին ավտոբուսները շարժվեցին: Ուշ երեկոյան ուխտվորները մեծ տպավորություններով բարեհաջող հասան Այնջար:

բոլոր նկարները…

Օգոստոսի 12-ին Այնջարի քաղաքապետարանում «Մուսալեռ» հայրենակցական միության երիտասարդական թևի Հայաստանյան ներկայացուցիչները` Աբրահամ Բալաբանյանը, Արսեն Համբարձումյանը, Արամ Շարբաթյանը, Լիբանանում ներկայացուցիչ Հերագ Հերգելյանը և վարչության խորհրդական Գաբրիել Փանոսյանը հանդիպեցին Այնջարի քաղաքապետ Կարո Փամբուկյանին: Զրույցի ընթացքում երիտասարդները ներկայացրեցին միությունը, խոսեցին իրենց գործունեության մասին: Իսկ Կարո Փամբուկյանը պատմեց Այնջարի պատմությունը, խոսեց առկա խնդիրներից ու ապագա ծրագրերից: Նա նշեց, որ մոտ ապագայում քաղաքապետարանը պատրաստվում է վերակառուցել ժամանակին Այնջարի հրապարակում եղած ժամացույցը, կառուցել քաղաքապետարանի նոր շենք և գործի դնել հանրային այգի: Ավելացրեց նաև, որ ծրագրերի մեջ են մտնում Այնջարի հին աղբյուրների վերականգնումը:

Հանդիպումը ավարտվեց քաղաքապետի հետ լուսանկարվելով:

Օգոստոսի 11-ին Բեյրութում «ԱԶԴԱԿ» խմբագրատուն այցելեցին «Մուսալեռ» հայրենակցական միության երիտասարդական թևի ատենապետ Աբրահամ Բալաբանյանը, վարչության անդամ Արսեն Համբարձումյանը, միության անդամ Արամ Շարբաթյանը և երիտսարդական թևի Լիբանանում ներկայացուցիչ Հերագ Հերգելյանը: Երիտասարդները հանդիպեցին խմբագրատան տնօրեն Շահան Գանդահարյանի հետ, ծանոթացան «ԱԶԴԱԿ»-ի աշխատանքին, խոսեցին Հայաստանում մուսալեռցիների մասին, ներկայացրեցին երիտասարդական թևի պատմությունը և աշխատանքները:

Այնջարի 70 ամյակի առթիվ «Մուսալեռ» հայրենակցական միության երիտասարդական թևը Այնջարին նվիրեց մի նոր երգ` «Այնջար-70»: Այս ուրախ երգը, որ ճիշտ բնութագրում է Այնջարը, սիրվեց բոլորի կողմից, և այժմ բոլոր մուսալեռցիների երգացանկի մաս է կազմում:

Երգի նախաձեռնություն` Գաբրիել Փանոսյան:

Խոսք և երաժշտություն` Գուսան Հայկազուն:

Երգի կատարողներ` Հայկ Մխոյան և «Հայկազունք» համույթ:

Ձևավորում` Լիլիթ Փափազյան և Աբրահամ Բալաբանյան:

Նախաձեռնության իրագործմանն աջակցել են`
Նայիրի Մկրտչյանը, Նայիրի Դումանյանը, Աստղիկ Փանոսյանը, Մուշեղ Գարագաշյանը և Թովմաս Այնթաբյանը:

Ձայնասկավառակը բացի «Այնջար-70» երգից պարունակում է նաև ութ այլ երգեր, որոնց հեղինակը Գուսան Հայկազունն է:
350 օրինակ ձայնասկավառակները վաճառքի կհանվեն Այնջարի տոնավաճառում:

«Այնջար-70» երգը լսեք այստեղ:

Օգոստոսի 8-ին, կիրակի երեկոյան «Գյուլբենկյան» սրահում տեղի ունեցավ մուսալեռցի-այնջարցի արվեստագետների հավաքական ցուցահանդեսի բացումը: Մասնակցում էին բազմաթիվ մուսալեռցի արվեստագետներ, որոնցից շատերը երիտասարդներ էին: Իրենց աշխատանքներն էին ցուցադրում նաև Համազգայինի Այնջարի «Պ. Սևակ» մասնաճյուղի «Ռուբեն Նագյան» արվեստի դպրոցի աշակերտները:

Նույն օրը տեղի ունեցավ Այնջարի Հայ ավետարանական եկեղեցու սրահի բացումը: